Төрлет, әз Наурыз!

А. С. Пушкин атындағы қалалық балалар кітапханасында Ұлыстың Ұлы күні қарсаңында «Төрлет, әз Наурыз!» атты фольклорлық мереке ұйымдастырылды.

Жүргізуші тыңдармандарға Қазақстанда қайта жаңғырған Наурыз мерекесінің тарихын баяндап, оның негізгі дәстүрлерімен, мерекелік дастарқанға қойылатын ұлттық тағамдармен таныстырды, «Шашу» шашты. Сондай-ақ Қазақстан Республикасының Президенті Қасым-Жомарт Кемелұлы Тоқаев патриотизмді насихаттау және ұлттық дәстүрлерді жаңғырту мақсатында мереке күндері (10 күн ішінде) мекемелер мен ұйымдарда қазақ халық әндері шырқалуы, ұлттық ойындар ойналуы, дәстүрлер көрсетілуі қажеттігін аңғартқанын және ұлттық нақыштағы киім киюді ұсынғанын жеткізді.

«Жұлдыз» домбыра студиясы кітапхана оқырмандарын «Балбырауын», «Құлагер», «Тепен көк», «Өрлеу» сынды күйлерімен қуантты, Назар Гүлбахар мен Саттыбаева Алтынай жетіген аспабында «Арбиян қоңыр» күйін орындап, тыңдармандарды тәнті етті. Ахмет Жұбановтың «Вальс» туындысын қобызда ойнаған Қостанай педагогикалық институтының студенті Сағымбай Жұлдызай ерекше ықыласқа бөленді.

Қатысушылар мерекелік іс-шарадан ерекше әсер алды, сондай-ақ Наурыз көже, құрт көже, ірімшік, айран, жент, сүзбе сынды ұлттық тағамдардан дәм татты.